Tilraunalandið

Suðurlandsferðin hafin

tilraunalandid — Sun, 08 Aug 2010 16:46:37 +0000

Farandsýning Tilraunalandsins er nú um borð í Herjólfi, á leið til Vestmannaeyja. Í gær tók Tilraunalandið þátt í hátíðinni Sumar á Selfossi. Það ringdi töluvert, en það gerði tjöldin sem eru hluti af sýningunni bara þeim mun vinsælli. Þá bjuggu starfsmennirnir líka til nýja “tilraun” á staðnum, sem snerist um það að sjá hversu lengi Vatnshöggið væri að fyllast með regnvatni. Það tók 36 mínútur (reyndar með hjálp frá nokkrum smærri fötum).

Nú taka við tveir dagar í Vestmannaeyjum, og síðan áfram eftir suðurströndinni.

Sól og sumar á Norðurlandi!

tilraunalandid — Tue, 20 Jul 2010 13:30:01 +0000

Norðurlandið hefur tekið á móti Tilraunalandinu með sól og blíðu undanfarna daga. Um helgina var sýningin á Húnavöku á Blönduósi og síðan á Sauðárkróki en þessa dagana tekur Tilraunalandið þátt í Mærudögum/Sænskum dögum á Húsavík.

Það er rétt að benda á smá breytingu í dagskránni, en ákveðið hefur verið að Tilraunalandið verði á Akureyri viku seinna en upprunalega hafði verið áætlað. Sýningin verður þar 27. ágúst til 1. september, en þaðan verður síðan haldið á Ljósanótt í Reykjanesbæ. Annars eru nýjir áfangastaðir að detta inn þessa dagana, svo fylgist vel með hér til hægri!

Myndir af Farandsýningu Tilraunalandsins

tilraunalandid — Thu, 08 Jul 2010 15:24:55 +0000

Tilraunalandið nýtir sér að sjálfsögðu tæknina og er komið með síðu á ljósmyndavefnum Flickr. Myndirnar má finna með því að fara á þessa vefslóð: http://www.flickr.com/photos/51690199@N07/, en þær nýjustu birtast einnig hér hægra megin á Bloggsíðunni.

Tilraunalandið á öldum Breiðafjarðarins

tilraunalandid — Thu, 08 Jul 2010 15:19:09 +0000

Þegar þessi orð eru skrifuð hefur Tilraunalandið komið sér fyrir í Breiðafjarðaferjunni Baldri. Aðrir farþegar fá þó ekki að njóta sýningarinnar enda hún geymd fyrir neðan dekk. Ástæðan er náttúrulega sú að eftir frábæra daga á Snæfellsnesi er komið að Vestfjörðunum að njóta Tilraunalandsins, en þar eru áfangastaðirnir tveir í þessari lotu. Á morgun verður sýningin á Patreksfirði og á laugardaginn tekur Tilraunalandið þátt í Sæluhelgi á Suðureyri.

Rétt er að taka fram að upprunalega átti sýningin að vera á Sjúkrahústúninu á Ísafirði, en í sameiningu með Ísafjarðarbæ var tekin ákvörðun um að færa hana og hafa Tilraunalandið þannig með í hátíð sveitarfélagsins.

Tilraunalandið gefst ekki upp þó á móti blási (bókstaflega): Stykkishólmur og Grundarfjörður

tilraunalandid — Wed, 07 Jul 2010 16:34:34 +0000

Nú er Farandsýning Tilraunalandsins á Snæfellsnesi. Í gær var sýningin sett upp í hjá Grunnskólanum í Stykkishólmi gestum og gangandi til ánægju og yndisauka. Tilraunalandið ferðast um í tveimur vögnum, sem eru dregnir af tveimur bílum. Á Stykkishólmi var annar bíllinn færður burt af sýningarsvæðinu og eitthvað ruglaði það unga mær sem velti því mikið fyrir sér hvernig einn bíll gæti dregið vagnana tvo. Þar sem þeirri tilraun hefur ekki verið bætt við Tilraunalandið verður fólk að láta sér nægja Skjaldbökubílana, sem raunar önnuðu varla eftirspurn í Stykkishólmi.

Í gærkvöldi var síðan keyrt til Grundarfjarðar þar sem Tilraunalandið hefur verið með sýningu í dag. Í morgun stefndi í vanda, þar sem veðurguðurnir ákváðu að skella á roki. En Tilraunalandið dó ekki ráðalaust og fékk inni í íþróttahúsi bæjarins þar sem hefur verið mikið líf og fjör í allan dag. Meðal annars var Vindbyssan dregin fram og slökkt á kertum, í tilefni þess að sýningin var innandyra. Nú er ferðinni heitið yfir Breiðafjörðinn upp á Patreksfjörð og síðan Sæluhelgi á Suðureyri.

Förinni haldið áfram: Írskir dagar á Akranesi og Búðardalur

tilraunalandid — Mon, 05 Jul 2010 00:04:30 +0000

Farandsýning Tilraunalandsins rann í gærkvöld í hlaðið í Búðardal þar sem sýningin opnar á hádegi í dag. Um helgina tók Tilraunalandið þátt í Írskum dögum á Akranesi og vakti þar mikla lukku. Það var stöðugur straumur gesta og ungir jafnt sem aldnir skemmtu sér konunglega við að prófa Gyrohjólið, brjóta heilann um Risaskilnaðinn eða sulla aðeins í Vatnshögginu. Margir gestanna komu tvo daga í röð, mættu seinni daginn til þess að skoða það sem þeir komust ekki yfir fyrri daginn eða til að leysa ráðgátur sem þeir höfðu brotið heilann um yfir nóttina.

Eins og fyrr segir er næst á dagskrá að leyfa íbúum Búðardals að kynnast Tilraunalandinu og þaðan er förinni heitið á Snæfellsnesið áður en Vestfirðirnir verða sóttir heim. Hægt er að fylgjast með dagskránni hér til hægri á síðunni. Þar er einnig tengill á Flickr-síðu Tilraunalandsins þar sem myndir af flakkinu er að finna.

Myndir af ferðalagi Tilraunalandsins /Hveragerði

tilraunalandid — Fri, 02 Jul 2010 14:19:59 +0000

Tilraunalandið leggur í’ann

tilraunalandid — Thu, 01 Jul 2010 15:12:52 +0000

Tilraunalandið leggur í’ann
Norræna húsið og Háskóli Íslands verða á ferð og flugi um allt land í sumar með farandsýningu Tilraunalandsins. Í Tilraunalandinu kynnast börn og ungmenni undraheimum vísindanna í gegnum leik og skemmtun.
Nú komið að því að kynna Tilraunalandið víða um landið og er Landsvirkjun aðalstyrktaraðili ferðarinnar. Það er ekki ofsögum sagt að nánast öll börn á höfuðborgarsvæðinu þekki Tilraunaland Norræna hússins og Háskóla Íslands. Sýningin hefur slegið í gegn og mörg þúsund manns hafa gert sér ferð niður í Vatnsmýrina.

„Tilraunalandið hefur gefist mjög vel í Vatnsmýri og verið mikið sótt af hópum úr grunnskólum, leikskólum og leikjanámskeiðum, sem og fjölskyldufólki,“ segir Þuríður Helga Kristjándóttir, verkefnastjóri Tilraunalandsins. „Af þeim sökum hefur verið ákveðið að gefa fleirum færi á að kynnast vísindunum á þennan lifandi og skemmtilega hátt með því að taka sýninguna á ferð um landið í sumar.“

Tveir vagnar fullir af fjörugum tilraunum Tilraunalandsins munu skrölta um ögrum skorið landið og heimsækja hvern bæinn á fætur öðrum. Hægt verður að fylgjast með ferðum þeirra á sérstakri bloggsíðu, www.tilraunalandid.wordpress.com , og einnig verður hægt að skoða dagskrána á síðu Norræna hússins, www.norrraenahusid.is . Vagnarnir eiga ekki að fara framhjá neinum þar sem þeir eru fagurlega merktir Tilraunalandinu og í björtum litum.

Undanfarna daga hefur farandsýningin verið á flakki um höfuðborgarsvæðið og í Hveragerði, þar sem henni hefur verið einstaklega vel tekið.

Enn eru áfangastaðir að bætast við, en meðal annars má benda á að Tilraunalandið verður á Írskum dögum á Akranesi 3.-4. júlí og Sænskum dögum á Húsavík 20.-21. júlí. Þá verður sýningin á Akureyri vikuna 21. til 27. ágúst.

Fyrir frekari upplýsingar eða bókanir má hafa samband við verkefnisstjóra farandssýningar Tilraunalandsins:

Sölvi Karlsson, s. 865 0257, solvi.karlsson@gmail.com
Stefán Dal, s. 6968457, stefandal@simnet.is

Tilraunalandið fer um allt Ísland

tilraunalandid — Tue, 29 Jun 2010 14:38:24 +0000

Tilraunaglaðir krakkar um allt land geta nú kynnst Tilraunalandinu því það verður á ferð og flugi út sumarið. Nú þegar hafa vagnar með allskyns tilraunum og tækjum heimsótt Hafnarfjörð, Mosfellsbæ og Keflavík en stefna á Akranes í næstu ferð. Fylgist hér með ferðum Tilraunalandsins um Ísland.

Myndin er frá Vatnsmýrarhátíðinni en þá flutti Tilraunalandið út í hvíta listskálann á lóð Norræna hússins. Sá skáli verður opin út september, frír aðgangur, komið aftur og aftur.

Tilraunakveðjur úr Norræna húsinu.

Tilraunalandið í MBL sjónvarp

tilraunalandid — Mon, 03 May 2010 11:45:40 +0000

Myndskeið á Mbl sjónvarp um Tilraunalandið